- නීතිඥ ජගත් ලියන ආරච්චි - 

පාර්ලිමේන්තුව විසුරුවා හැර ඇති අවස්ථාවකදී යළි කැඳවිය හැකි අවස්ථාවන් දෙකක් අප ආණ්ඩුක‍්‍රම ව්‍යවස්ථාව තුළ දක්නට ලැබේ. 

එම අවස්ථා දෙකේදීම පාර්ලිමේන්තුව යළි කැදවීමේ නිවේදනය නිකුත් කළ හැක්කේ ජනාධිපතිතුමාට පමණි. 

එම අවස්ථා වන්නේ, 

01. හදිසි තත්වයක් උද්ගතවී ඇති අවස්ථාවකදී

විසුරුවා ඇති පාර්ලිමේන්තුව යලි කැදවීම ප‍්‍රතිපාදන දැක්වෙන්නේ ආණ්ඩුක‍්‍රම ව්‍යවස්ථාවේ 70 (7) ව්‍යවස්ථාව තුළය. ඒ අනුව

“පාර්ලිමේන්තුව විසුරුවා හරිනු ලැබීමෙන් පසුව කවර අවස්ථාවක වුව ද පාර්ලිමේන්තුව නියමිත දිනයට කලින් රැස්වීම අවශ්‍යවන ස්වභාවයක හදිසි තත්ත්වයක් උද්ගත වී ඇති බවට ජනාධිපතිවරයා සෑහීමකට පත් වුවහොත් විසුරුවා හැර ඇති පාර්ලිමේන්තුව ප‍්‍රකාශනයක් මගින්, ඒ ප‍්‍රකාශනයේ දින සිට තුන් දවසකට කලින් දිනයක් නොවිය යුතු දිනයක දී රැස්වන ලෙස කැඳවීමට ජනාධිපතිවරයාට බලය ඇත්තේ ය. එසේ කැඳවනු ලැබූ පාර්ලිමේන්තුව හදිසි අවස්ථාව අවසන් වීම හෝ මහ මැතිවරණය අවසන් වීම යන මෙයින් කලින් එළඹෙන අවස්ථාවේ දී විසිරෙන්නේ ය.”

මේ අනුව විසුරුවා හැර ඇති පාර්ලිමේන්තුව නැවත කැඳවීමේ බලය ව්‍යවස්ථාවට අනුව පවතින්නේ ජනාධිපතිවරයාටය. එවැනි අවස්ථාවක ජනාධිපතිවරයා විසින් ප‍්‍රකාශයක් මගින් පාර්ලිමේන්තුව නැවත කැදවුවහොත් හදිසි අවස්ථාව පහවීම හෝ මහ මැතිවරණය දක්වා එකී පාර්ලිමේන්තුව බලපැවෙත්වෙනු ඇත.

02. හදිසි අවස්ථාව පිළිබඳ ප‍්‍රකාශය සම්මත කිරීම සඳහා

පාර්ලිමේන්තුව විසුරුවාහැර ඇති අවස්ථාවකදී ජනාධිපතිතුමා විසින් හදිසි අවස්ථාවක් ප‍්‍රකාශයට පත් කර ඇති විටක එම හදිසි අවස්ථාව පිළිබඳ ප‍්‍රකාශය දින 10ක් තුල පාර්ලිමේන්තුව තුලින් සම්මත කරවා ගැනීමේ සදහා පාර්ලිමේන්තුව කැදවීමේ බලය ජනාධිපතිවරයාට ඇති බව ආණ්ඩුක‍්‍රම ව්‍යවස්ථාවේ 155(4) ව්‍යවස්ථාවේ මෙසේ දැක්වේ.

“(4)එවැනි ප‍්‍රකාශනයක් කරනු ලැබූ විට ඒ බව, මේ ව්‍යවස්ථාවේ අනෙකුත් විධිවිධානවලට යටත්ව, නොපමාව ම පාර්ලිමේන්තුවට දන්වා යැවිය යුත්තේ ය; තවද ඒ අනුව 

(i) ඒ ප‍්‍රකාශනය නිකුත් කරනු ලැබුවේ පාර්ලිමේන්තුව විසුරුවා හරිනු ලැබීමෙන් පසුව නම්, ඒ ප‍්‍රකාශනයෙහි පාර්ලිමේන්තුව රැුස්වීම සඳහා කලින් දිනයක් නියම කර ඇතොත් මිස, ඒ ප‍්‍රකාශනයෙන් අනතුරුව එළඹෙන දස වන දිනයෙහි පාර්ලිමේන්තුව රැුස්වීම පිණිස කරන කැඳවීමක් සේ ඒ ප‍්‍රකාශනය ක‍්‍රියාත්මක වන්නේ ය. පාර්ලිමේන්තුව රැුස්වීම සඳහා ඒ ප‍්‍රකාශනයෙහි යම් දිනයක් නියම කරනු ලබන්නේ නම් ඒ දිනය එකී ප‍්‍රකාශනය හෝ වැඩිදුරටත් කරනු ලැබූ යම් ප‍්‍රකාශනයක හෝ කාලය ඉකුත් වීම හෝ ඒ ප‍්‍රකාශනය හෝ වැඩිදුර ප‍්‍රකාශනය ප‍්‍රත්‍යාදිෂ්ට කිරීම නැතහොත් මහ මැතිවරණය නිමවීම යන අවස්ථා දෙකෙන් කලින් එළඹෙන අවස්ථාව තෙක් පවත්වා ගෙන යා යුත්තේ ය. එකී කාලය ඉකුත් වූ විට හෝ ප‍්‍රත්‍යාදිෂ්ට කිරීම කරනු ලැබූ විට හෝ මහ මැතිවරණය නිම වූ විට හෝ එසේ කැඳවනු ලැබූ පාර්ලිමේන්තුව විසිරෙන්නේ ය.

මෙම අවස්ථාව වන විට ජනාධිපතිතුමා හදිසි අවස්ථාව පිළිබදව ප‍්‍රකාශයක් නිකුත් කර නොමැති බැවින් මෙම ව්‍යවස්ථාමය ප‍්‍රතිපාදනය භාවිතා කළ නොහැක.

ලොව පුරා ව්‍යාප්ත නව කොරෝනා වසංගතය හමුවේ රට තුළ ආහාර නිෂ්පාදනය කඩිනම් කිරීම සදහා වැඩපිළිවෙළක් රජය විසින් ආරම්භකර ඇත. "සෞභාග්‍යා ගෙවත්ත" තේමාවෙන් ක්‍රියාත්මක වන මෙම වැඩපිළිවෙළ කෘෂිකර්ම දෙපාර්තමේන්තුව, ගොවිජන සංවර්ධන දෙපාර්තමේන්තුව සහ මහවැලි අධිකාරියේ දායකත්වයෙන් අද (2) ආරම්භ විය.

මෙම වැඩසටහනට සමගාමීව www.saubagya.lk වෙබ් පිටුව මහජනතාවට හඳුන්වා දුන් අතර මෙම වෙබ් පිටුවට අවතීර්ණ වී ගෙවතු වගාව සඳහා අවශ්‍ය බීජ සහ පැළ ඇනවුම් කිරීම, උපදෙස් ලබා ගැනීම සහ තම යෝජනා ඉදිරිපත් කිරීම සිදු කළහැක.

මෙම වැඩසටහන මගින් ගෙවතු දසලක්ෂයක් බිහිකිරීම රජයේ අභිප්‍රායයි.

- පාඨලී චම්පික රණවක -

කොවිඩ් 19 ගෝලීය වසංගතයක් බවට පත්වීම 

කොවිඩ්-19 ගෝලීය ලෙස ව්‍යාප්තිය මේ වනවිට උග්‍ර වී ඇත. විශේෂයෙන්ම යුරෝපයත්, එක්සත් ජනපදයත් අද එහි ව්‍යාප්තියේ කේන්ද්‍ර බවට පත්වී ඇත. එක්සත් ජනපද ජනාධිපති ඩොනල්ඩ් ට්‍රම්ප් කීවේ ඉදිරි සති දෙක තීරනාත්මක බවයි. ලක්ෂයේ සිට දෙලක්ෂය දක්වා ජනතාවක් ලොක් ඩවුන් තත්වයට යටතේ මිය යා හැකි බව තමනට දැනුම් දී ඇතැයි ඔහු පැවසුවේය. ලොක් ඩවුන් නොකලා නම් මිය යන පිරිස දශ ලක්ෂය ඉක්මවා යන හෙයින් මේ තත්වයද ජයග්‍රහණයක් ලෙස තමාට දැනෙන්නේ යැයි ඔහු පැවසීය. ඔහුගේ එම ප්‍රකාශය පිළිබඳව ට්‍රම්ප් ජනාධිපතිවරයාව මේ වනව විට ධරුණු විවේචනයකට ලක්ව ඇත.

මේ අතර එක්සත් ජාතීන්ගේ මහ ලේකම්වරයා කොවිඩ් වසංගතය දෙවන ලෝක මහා සංග්‍රාමයට සමාන කළේය. ලෝකය සිය දල ජාතික නිෂ්පාදිතයෙන් 10% ක් වසංගතය මැඩ පැවැත්වීම සඳහා වැයකළ යුතු බවද ප්‍රකාශ කළේය. දැනට එසේ කර ඇත්තේ එක්සත් ජනපදය, සිංගප්පූරුව හා ජර්මනිය වැනි රටවල් කිහිපයක් පමණි.

ලෝක ඉතිහාසයේ ඇතිවූ වසංගත තත්ත්වයන් 

ලෝක ඉතිහාසය දෙස බලන විට පසුගිය වසර 500 ක පමණ කාලය තුළ බලගතු වසංගත ගණනාවක් ඇතිවී ඇත. 14 වැනි සියවසේ ඇතිවූ කෘෂ්ණ වසංගතය නිසා අඩු තරමින් මිලියන 50-100 ක් අතර ප්‍රමාණයක් මිය යන්නට ඇතැයි විශ්වාස කෙරේ. යුරෝපයේ සිදුවූ මොන්ගෝලියානු ආක්‍රමණයද ඒ සමගම මිය ගියේය. ඊළඟට 16 වැනි ශතවර්ෂයේදී පෘතුගීසි හා ස්පාඤ්ඤ නාවිකයන් නිසා ලතින් ඇමරිකාවට, අප්‍රිකාවට හා ආසියාවට පැපොල හා සරම්ප පැතිර ගියේය. ඉන්කා - මායා - ඇස්ටෙක් ආදී මෙසෝ ඇමරිකානු ශිෂ්ටාචාරවල අවසානයේ එක් කොනක් වූයේද එකී වසංගතයන්ය. ලංකාවේද ඉහත රෝගවලට පරංගි උණ යැයි භාවිත කෙරිණි. ඉන්පසු 1918 දී ස්පාඤ්ඤය හා යුරෝපයේද, ඉන්දියාවේද පැතිර ගිය උණ වසංගත තත්වයයි. එයින්ද මිලියන ගණනක් මියගියහ. මෑත කාලයේ ඒඩ්ස් (1982), සාර්ස් (2004), ඉබෝලා (2014) මෙවැනි වසංගතයන් වූහ. කෙසේ වෙතත් කොවිඩ්-19 මෙන්ම ලෝකයම වෙලාගත් වසංගතයක් බවට මේ කිසිදු වසංගතයක් පත්වූයේ නැත.

ඇතැම් විචාරකයන් රෝග ව්‍යාප්තියට හේතුව ලෙස දකින්නේ ගෝලීයකරණයයි. තවත් විචාරකයින් කියන්නේ ගෝලීයකරණය නැතුව වුව අතීතයේදී කාලයත් සමග රෝග ව්‍යාප්තිය සිදුවූ බවය. වංසගත රෝග පාලනය සඳහා ගල් යුගයට යෑම හැර විසඳුමක් නැතැයි කියන්නෝද වෙති. කෙසේ වෙතත් රෝගය පාලනයට දින නියමයක් නැතිව ඇඳිරි නීතිය ආදිය යොදා ගැනීම නිසා දුගී රටවල ජනයා ඖෂධ හා ආහාර නොමැතිකමින් ගල් යුගයේ තත්වයටම පත්වෙමින් සිටිති.

නිර්මාණශීලී නූතන මානවයා 

හෝමෝ සේපියන් හෙවත් නූතන මානවයාගේ ස්වභාවය නම් සිය පැවැත්ම තර්ජනයට ලක්වූ විට පුදුමාකාර ලෙස ඒ සඳහා නිර්මාණශීලී වීමය. යුද සමයන් හා වසංගත සමයන් මානවයා පියමං කර ඇත්තේ තාක්ෂණික හා සමාජ සබඳතාවල විප්ලවයක්ද සමගය.

කොවිඩ්-19 නිසා දැනටමත් සිදුවෙමින් පැවතුණු තාක්ෂණික විප්ලවයන් වර්ධනය වෙමින් පවතී. කාලයක සිට දුරස්ථ අධ්‍යාපනය සඳහා (Online Learning) යොදාගත් ZOOM App එක දැන් විශ්ව විද්‍යාල හා පාසල්වලට අමතරව දේශපාලන නායකයන්ද යෙදා ගනිති. සමගි ජන බලවේගයේ නායකයෝ දිනපතා දේශපාලන සාකච්ඡා පවත්වන්නේ එය යොදා ගනිමිනි. පක්ෂ නායක රැස්වීම් මෙන්ම අමාත්‍ය මණ්ඩල රැස්වීම්ද ඔන්ලයින් ක්‍රමයට පහසුවෙන් පරිවර්තනය කළ හැක. මෙය අවශ්‍ය නම් පාර්ලිමේන්තුවටද යොදාගත හැකිය.

රෝග විනිශ්චය තොරතුරු තාක්ෂණයට භාරදීම 

කොවිඩ්-19 වසංගතය විසින් සිදුකළ අනෙක් දත්ත විප්ලවය නම් පුද්ගලයින්ගේ හැසිරීම, ඔවුන් සිටින ස්ථානය, ඔවුන් රෝගීන් ස්පර්ෂ කළාද යන්න හා ඔවුනගේ රෝග විනිශ්චය තොරතුරු තාක්ෂණයට භාරදීමය. කලකට ඉහත මානව හිමිකම් ක්‍රියාකාරීන් රුසියාව, සිංගප්පූරුව, චීනය වැනි රටවල් විවේචනය කළේ ඔවුන් කැමරා, දුරකථන, ඔරලෝසු ආදිය හරහා පුද්ගලයින් නිරීක්ෂණය කරන බවයි. දැන් බ්‍රිතාන්‍ය, ප්‍රංශය වැනි ලිබරල් මත දරන රටවල්ද සිය ප්‍රජාව නිරීක්ෂණය කරමින්, අවවාද කරමින් හා තොරතුරු මත පදනම්ව දඬුවම් කරමින් සිටිති. කලකට පෙර CIA, KGB, RAW, MOSSAD, M15 හෝ වෙනත් ඔත්තු සේවාවන් ඉතා සීමිත ජනතාවක් පිළිබඳව දැන සිටි තොරතුරු දැන් සිය සමස්ථ ජනකාය සම්බන්ධයෙන්ම, අවශ්‍ය නම් Google, Facebook, WhatsApp වැනි සමාජ මාධ්‍ය උපාංග සමග සම්බන්ධිත බිලියන ගණන් ජනතාව නිරීක්ෂණය කිරීමට BIG DATA PLATFORM එකක් තනාගත හැක. එක්සත් ජනපදය Prism නමින් එවැනි පද්ධතියක් තනාගත් බව ලොවට කිව්වේ ස්නෝ ඩෙන් විසිනි. දැන් බොහෝ රටවල් එවැනි විමර්ෂණකාමී තොරතුරු පද්ධති තමන්ගේ රටවල ස්ථාපිත කරමින් සිටිති. කොවිඩ්-19 අවසන් වන්නේ ප්‍රබල ලිබරල් සංකල්පයක් වන "පුද්ගලිකත්වය" යන්නද අවසන් වීමෙන් බව පැහැදිලිය.

කෘත්‍රිම බුද්ධිය (AI) ඇතිවූ මුල් අවධියේදී හටගත් බියක් නම් ගණකාධිකාරී, වෛද්‍ය, නීති, ලිපිකරු ආදී වෘත්තීන් ගණනාවක් අහෝසි වී විගණනය හා පොත් තැබීම, රෝග විනිශ්චය, නීති උපදෙස්, ලිපි ලේඛන සැකසීම ආදිය පරිගණකයට (AI) කළ හැකි බවය. කොවිඩ්-19 නිරීක්ෂණය දැන් බොහෝ රටවල් පරිගණකවලට බාරදී ඇත. කොටින්ම ඇපල් වැනි ආයතන ඒ සඳහාම වූ සුවිශේෂී App දැනටමත් නිර්මාණය කර ඇත. මුළු මහත් ජනකායකගේම රෝගී දත්ත තනි පරිගණකයකට බාර දීමේ අනතුරක් නැතිද? ඇතැම් රටවල මැතිවරණ මෙහෙයවීමේදී පුරවැසියන්ගේ රෝග තත්වයන් පිළිබඳ දත්ත යොදා ගැනීම ගැන චෝදනා පසුගිය වසර කීපය තුළම බටහිර ලෝකයේ පැනනැංගේය.

දත්ත ඒකාධිපතියන්ගෙන් අවසන් වන කොවිඩ් 19 

කොවිඩ්-19 ඇතැම්විට අවසන් වන්නේ දත්ත ඒකාධිපතියන් (Big Data Dictators) බිහිවීමෙන් විය හැකිය. ජනතාවට අයත් සංඛ්‍යාත අවකාශය අල්ලාගෙන සිටින කෑදර ව්‍යාපාරිකයන් කිහිප දෙනෙකු ශ්‍රී ලාංකික ජන සමාජය අල්ලේ නටවන ආකාරය දෙස බලන කල එයට වඩා සියුම් මෙන්ම පුළුල් නව දත්ත ෆැසිස්ට්වාදයක් ඇතිවීමේ අනතුර පැනනැගී ඇත. නූතන ගොබෙල්ස්ලා රූපවාහිනී නාලිකාවලින් පමණක් නොව Facebook, WhatsApp හා AI හරහාද බිහිවිය හැකිය.

පසුගිය දශකය (2010-20) සීග්‍ර වර්ධනයට ලක්වූ ක්ෂේත්‍රයක් වූයේ ජාන විද්‍යාව හා ජාන තාක්ෂණයයි. වසර ලක්ෂ තුනක් පමණ කාලයක් ස්වභාවිකව ජාන පරිණාමයකට ලක්වූ හෝමෝ සේපියන් කෘත්‍රිම ජාන ක්‍රියාවලියක් මගින් සුපිරි නව ජීවියෙක් තනා ගැනීමේ ඉඩකඩ ගැන විචාරකයෝ බොහෝ කලක සිට අනාවැකි පලකළහ. පසුගිය වසරේ චීන විද්‍යාඥයෙක් ඒඩ්ස් වෛරසයට ඔරොත්තු දෙන ලෙස ජාන සැකසූ කලලයක් හා දරුවෙක් බිහිකළේය. අනාගතයේදී ධනය, බලය හා දත්ත ඇති කිහිප දෙනෙක් ඒ අනුව කොවිඩ් වැනි රෝගවලට ඔරොත්තු දෙන දරුවන් බිහිකර ගනීවිද? කලකට පෙර දැනුම බලය වේ යන කියමන ධනය බලය වේ යන ලෙස වෙනස් වූවා සේ දැන් දත්ත බලය වේ ලෙස වෙනස් වී ඇත.

කොවිඩ්-19 නිසා බරපතල අර්බුදයකට ලක්වී ඇත්තේ ආර්ථිකයයි. දැනටමත් ශ්‍රී ලංකාව, ඉන්දියාව වැනි රටවල ඇඳිරි නීතිය නිසා දුගී ජනයා මහ පොලොවේ දූවිලි තත්වයට වැටී සිටිති. දැනට ඇත්තේ මාස කිහිපයකට බලපාන අවපාතයක් (Recession) පමණි. අනාගතයේ එය ආර්ථික බිඳවැටීමක් (Depression) බවට පත්වේද? දැන් දැන් ආර්ථික විශේෂඥයින් පවසන්නේ ලෝකය කොවිඩ් මර්දනය හා ජනතාවගේ ආර්ථිකය අතර තුලිත භාවයක් (Trade Off) ඇතිකර ගත යුතු බවයි. නැත්නම් ඖෂධ හිඟකමින්, ආහාර හිඟකමින් හා විවිධ රෝගාබාධ නිසා කොවිඩ් වලට වඩා වැඩි මරණ සංඛ්‍යාවක් ඇතිවිය හැකි බවයි. පෙරළා සෞඛ්‍ය අංශ පවසන්නේ කොවිඩ්-19 මරණ විසින් යළි ආපසු හැරවිය නොහැකි ආර්ථික ව්‍යසනයකට ලෝකය පත්කළ හැකි බවයි.

කොවිඩ්-19 කවදා අවසන් වේදැයි කිව නොහැක. රටවල් වසා දමන අතරේ ඒ ඒ රටවල අත්දැකීම් හා තාක්ෂණය හුවමාරුකර ගැනීම අත්‍යාවශ්‍යය. සිංගප්පූරුව, තායිවානය, හොංකොං, කොරියාව හා චීනය ලබාගෙන ඇති අත්දැකීම් මෙහිදී අන් රටවල් සමග බෙදා ගැනීම අත්‍යාවශ්‍යය. එමෙන්ම, ජපානය, ජර්මනිය, ඊශ්‍රායලය හා එක්සත් ජනපදය ලබාගෙන ඇති තාක්ෂණික තොරතුරු බෙදා හදා ගැනීමද අත්‍යාවශ්‍යය. දැන් එක්සත් ජාතීන් එයට මැදිහත් විය යුතුය. එයට අමතරව රට රටවල් වසා දැමීම නිසා ඖෂධ නැතිකමින්, ආහාර නැතිකමින් පීඩා විඳින රටවලට ජාත්‍යන්තර බෙදාහැරීමේ ක්‍රමවේදයක්ද දැන් අවශ්‍යය. ගෝලීයකරණය නිසා ව්‍යාප්ත වූ කොවිඩ්-19 මර්දනයට පශ්චාත් ගෝලීයකරණ උපායවලියක් අවශ්‍ය වී ඇත.

2000 වර්ෂයේ දෙසැම්බර් මස සිදු වූ මිරුසුවිල් සංහාරයේ වැරදිකරුට ජනාධිපති සමාව දීමට අදාළ සියලු ලේඛන ප්‍රසිද්ධියට පත් කරන මෙන් ට්‍රාන්ස්පේරන්සි ශ්‍රී ලංකා ආයතනය (TISL) ජනාධිපති ලේකම් කාර්යාලයෙන් ඉල්ලා සිටී. එසේ කිරීමට අපොහොසත් වුවහොත්, විධායකය හා අධිකරණය අතර බලය බෙදීමේ  ව්‍යවස්ථාමය ප්‍රතිපත්තියට සුව කල නොහැකි  හානියක් සිදුවනු ඇතැයි   TISL ආයතනය විශ්වාස  කරයි. විශේෂයෙන් මෙම නඩු තීන්දුව හා මහාධිකරණයෙන් ලබා දුන් දඬුවම, 2019 වර්ෂයේ අප්‍රේල් මස, බුවනෙක අලුවිහාරේ, නලින් පෙරේරා, සිසිර ද ආබෘ, ප්‍රියන්ත ජයවර්ධන හා මුර්ධු ප්‍රනාන්දු යන පංච පුද්ගල ශ්‍රේෂ්ඨාධිකරණ විනිසුරු මඩුල්ල විසින් සනාථ කර ඇති බැවින්  මෙම තත්වය වඩාත් බරපතල වේ.  

ආණ්ඩුක්‍රම ව්‍යවස්ථාවේ 34 වන වගන්තිය මඟින්, ඕනෑම වරදකරුවෙකුට සමාව ප්‍රදානය කිරීමට ජනාධිපතිවරයාට බලය පවරා ඇත ද, එම වගන්තිය තුළම උක්ත බලයට යම් සීමා පනවමින් දක්වා ඇත්තේ "එසේ වූ යම් වරදකරුවෙකුට අධිකරණයකින් මරණ දඬුවම නියම වූ විටක ජනාධිපතිවරයා විසින් ඒ නඩුව විභාග කළ විනිශ්චයකාරවරයාගෙන් වාර්තාවක් ලබා ගැනීමට සැලැස්විය යුත්තේය. එම වාර්තාව ජනාධිපතිවරයා වෙත ලැබුණු විට, ඒ පිළිබඳව නීතිපතිවරයාගේ උපදෙස් දීමෙන් පසුව නීතිපතිවරයාගේ ඒ උපදෙස් සමඟ එය අධිකරණ විෂය භාර අමාත්‍යවරයා වෙත යැවිය යුතු බව නියම කොට ජනාධිපතිවරයා විසින් එය නීතිපතිවරයා වෙත යැවිය යුත්තේය. ඉන්පසු ඒ අමාත්‍යවරයා විසින් සිය නිර්දේශද සමඟ එම වාර්තාව ජනාධිපතිවරයා වෙත යැවිය යුත්තේය” 

තව ද, තොරතුරු දැනගැනීමේ පනත යටතේ, 2017 පෙබරවාරි මස ප්‍රකාශයට පත් කරන ලද ගැසට් අංක 2004/66, රෙගුලාසි අංක  20/1/iv අනුව,සියලුම රාජ්‍ය ආයතන,"තීරණ හා ක්‍රියාකාරකම් - තීරණ හා විශේෂයෙන්ම පොදු ජනතාවට බලපාන සේ ගත්   ක්‍රියාමාර්ග, ඒවාට පදනම් කරගත් දත්ත ලියවිලි සමඟ ප්‍රගාමිව ප්‍රසිද්ධියට පත් කිරීම අවශ්‍ය වේ." TISL ආයතනය විශ්වාස කරන්නේ මරණ දඬුවම නියම වූ වැරදිකරුවෙකුට සමාව දීම,සහ සමාව දීමට අදාළ ලේඛනයන් යටපත් කිරීම, මෙම කාරණාව ජනතාවට ඍජුවම බලපාන බවට ඔප්පු කරන සාධකයන් වන බවයි. 

TISL ආයතනයේ විධායක අධ්‍යක්‍ෂ අසෝක ඔබේසේකර පැවසුවේ,"සමාව ලබාදීමේ නිසි ක්‍රියාවලියට  අදාළ ලිපි ලේඛන ප්‍රසිද්ධියට පත් නොකර ජනාධිපති සමාව  දීමේ බලය ක්‍රියාත්මක කළ අවස්ථාවන් දෙකක් අපි මෑත ඉතිහාසය තුළ අත්විඳ ඇත්තෙමු. මෙලෙස අධිකරණ ක්‍රියාපටිපාටිය යටපත් කරමින් විධායක බලතල ක්‍රියාවට නැංවීමේ ප්‍රවනතාවය ඉතා බාධාකාරී තත්වයක් ඇති කිරීමට හැකියාව පවතී.මක් නිසාද යත්,පවතින නිතිය යටතේ යුක්තියේ බේරුම්කරුවා ලෙස අධිකරණය  කෙරෙහි මහජනතාවගේ විශ්වාසය බිඳ වැටීමට එය හේතුවක් වන බැවිනි". 

ඔහු වැඩිදුරටත්  ප්‍රකාශ කලේ, මෑත කාලින සිදුවීම් දෙක සඳහාම රාජපක්‍ෂ සහ සිරිසේන ජනාධිපතිවරුන් සඳහා ලබා දුන් උපදෙස් ලේඛනයන් වහාම ප්‍රසිද්ධියට පත් කිරීම අත්‍යවශ්‍ය වන බවත් එලෙස තොරතුරු ප්‍රසිද්ධියට පත් කිරීම තුළින් ජනාධිපති රාජපක්‍ෂ මහතාගේ "තාක්ෂණික රාජ්‍ය පාලනය" ට ඇති කැපවීම ද ඉස්මතු කරනු ඇති බවත් ය. 

ආණ්ඩුක්‍රම ව්‍යවස්ථාවේ සහ RTI පනතේ විධිවිධාන වලට අනුකූලව, නඩුව විභාග කල විනිසුරුවරයාගේ වාර්තාව, නීතිපතිවරයාගේ උපදෙස් සහ අධිකරණ අමාත්‍යවරයාගේ නිර්දේශය ප්‍රසිද්ධියට පත් කරන මෙන් TISL ආයතනය ජනාධිපති ලේකම් පී.බී.ජයසුන්දරගෙන් ඉල්ලා සිටී. 

කොරෝනා වෛරසයත් සමග පීඩාවට පත්ව සිටින ජනතාවට සහන සැලසීමේ යාන්ත්‍රණය විධිමත් කළයුතු බවත් එවැනි වැඩපිළිවෙලක් වෙනුවෙන් ජනතා විමුක්ති පෙරමුණේ පිරිස් මැදිහත්වීමට සූදානම් බව අද (1) කොළඹදී පැවති මාධ්‍ය හමුවකදී එහි ප්‍රධාන ලේකම් ටිල්වින් සිල්වා අවධාරණය කළේය. 

මෙහිදී වැඩිදුරටත් අදහස් දැක්වූ ඔහු පෙන්වා දුන්නේ, 

‘‘ලෝකය පුරාම කොරෝනා වෛරසය ව්‍යාප්තවීමේ තත්වයක් තුළ රටක් හැටියටත් අපි මේ තත්වයට මුහුණ දෙන්නේ කොහොමද කියන අභියෝගය තියෙනවා. මේ වනවිටත් අපේ රටේ සමාජය තුළ මේ රෝගය ව්‍යාප්තවීම තැන් තැන්වල හමුවූ පවුල් ආශ්‍රය කළ සමීතමයන්ගෙන් සිදුවූ ව්‍යාප්තියක් දකින්න ලැබෙන්නේ. වැඩිම රෝගීන් සංඛ්‍යාවක් හමුවුණේ මාර්තු 31වැනිදා. ඒ සංඛ්‍යාව 21ක්. මේ අනුව බැලුවාම අපිට විශ්වාසයක් තිබෙනවා හැමදෙනාම එක් කරගත් ජාතික ක්‍රියාකාරී වැඩපිළිවෙළක් සකස් කිරීම තුළින් මේ උවදුරින් අපේ රට බේරාගන්න හැකියාව තිබෙනවා කියලා. විශේෂයෙන්ම මතක් කළ යුතු වන්නේ ලෝක ව්‍යාප්ත තත්වයක් තිබෙන මේ වසංගතයෙන් පැරදුණොත් පැරදෙන්නේ මුළු රටමයි. ඒ වගේම දිනුවොත් දින්නේ මුළු රටමයි.

මේ දක්වා වෛද්‍යවරුන්ගේ සිට පහළම සෞඛ්‍ය සේවකයන් දක්වා ආරක්‍ෂක අංශවල සියලු දෙනාගේ කැපවීම වගේම බැංකු ඇතුළු අත්‍යාවශ්‍ය සේවාවල යෙදී සිටින සියලුම දෙනාගේ කැපවීම නිසා අවම මට්ටමක රෝග ව්‍යාප්තිය පවත්වා ගන්න රටක් හැටියට අපි සමත්වී තිබෙනවා. ඒ නිසා ඒ වෙනුවෙන් කැපවූ සියලු දෙනාට අපි ස්තූතිවන්ත වෙනවා. ආණ්ඩුව පසුගිය කාලයේ අනුගමනය කළ ක්‍රියාමාර්ගවල යම් යම් අඩුපාඩු නිසා අද පවතින ව්‍යාප්ත වීමේ තත්වය තිබෙන බව පැහැදිළියි. අපි කරුණු සහිතව මීට පෙරත් පෙන්වා දුන්නා ඒ අඩුපාඩුකම් වළක්වා ගෙන නිසි පරිදි මේ ක්‍රියාදාමය වෙනුවෙන් යාන්ත්‍රණයක් ආණ්ඩුව සකස් කරයි කියලා අපේක්‍ෂාවෙන්. නමුත් අපි පෙන්වා දුන් මේ කරුණු කෙරෙහි ආණ්ඩුව ඒ තරම් අවධානයට ලක්කර නැති බව පේනවා. උදාහරණයක් හැටියට මේ රෝගය ලෝක මට්ටමන් ව්‍යාප්ත වෙන අවස්ථාවේ වරාය සහ ගුවන්තොටුපොළ වසා නිරෝධායන කටයුතු යෙදීමේ අවශ්‍යතාවය තිබුණා. නමුත් ආණ්ඩුව ඒ ක්‍රියාමාර්ගය අනුගමනය කළේ නැහැ. ඒ නිසා ගුවන්තොටුපොළෙන් පැමිණි මේ රටේ වැසියන් ඔවුන්ගේ නිවෙස්වලට පිටත් කර යැව්වා. දැන් පොලීසිය යොදවා මෙහෙයුම් සිදුකර ඔවුන්ව සොයා ගනිමින් සිටිනවා. මුලදීම ගත යුතු ක්‍රියාමාර්ග නොගත් නිසා මේ තත්වය ඇතිවුණා.

වර්තමානයේ ඇඳිරි නීතිය පනවා ගෙනයන ක්‍රියාමාර්ග නිසා යම් සාර්ථකත්වයක් ලබාගෙන තිබෙනවා. මේ තත්වය තුළ ජනතාවගේ පැත්තෙන් මතුවී තිබෙන ගැටළු අවම කරගැනීමට ක්‍රියාමාර්ග අනුගමනය කිරීම ආණ්ඩුවේ වගකීමක්. අපට තිබෙන්නේ ඒ සම්බන්ධයෙන් කරුණු පෙන්වා දීමටයි. අපි ඒ විදිහට හඳුනාගත්ත මූලික කරුණු කිහිපයක් තිබෙනවා.

එකක් තමයි අත්‍යාවශ්‍ය සෞඛ්‍ය සේවා පවත්වාගෙන යාම සහ ඖෂධ ලබාදීම. මේ වෙනකොට අනුගමනය කරන ජනතාව දුරස්ථකරන ක්‍රියාමාර්ගයක් ලෙස ඇඳිරි නීතිය පනවා තිබුණත් ඇඳිරිනීතිය අයින් කළ වහාම ඔවුන් ඖෂධ ලබා ගන්නත් උකස් මධ්‍යස්ථානවලත්, බැංකුවලත්, එළවළු වෙළඳපොළ, මාළු වෙළඳපොළ වගේ තැන්වලත් පොදි ගැහෙනවා. මේ නිසා ඇඳිරිනීතිය පැනවීමේ අරමුණ ඉෂ්ඨ වෙන්නේ නැහැ. ඒ තත්වයට පිළියම් යෙදිය යුතුයි. විශේෂයෙන්ම ඖෂධ ලබාදීමේ ක්‍රියාමාර්ග ගැන ආණ්ඩුව ප්‍රචාරය කළත් දිගුකාලීනව ඖෂධ ලබාගන්නා වැඩිහිටියන් ගර්භනී මාතාවන් ළමුන් සම්බන්ධයෙන් බරපතළ තත්වයන් මතුවී තිබෙනවා. ඊට ඉක්මනින්ම විසඳුමක් අවශ්‍යයයි. ඇඳිරි නීිතිය ඉවත් කරන කාලයේ ෆාමසිවලට ජනතාව රොක්වීම වැලැක්වීමේ ක්‍රියාමාර්ග වගේම අත්‍යාවශ්‍ය ඖෂධ සහ රෝගීන්ට ප්‍රතිකාර ලබාගැනීමේ ක්‍රියාමාර්ග ආණ්ඩුවේ චක්‍රලේඛවලින් සහ ප්‍රකාශවලින් සීමා නොවී ප්‍රායෝගිකව ක්‍රියාත්මක කිරීමේ අවශ්‍යතාවය තිබෙනවා. ආහාර බෙදාදීමේ ප්‍රශ්නයත් ඒ වගේමයි. ජනතාව මේ වනවිටත් යම්කිසි කැප කිරීමක් කරමින් දරාගෙන ඉන්න බව අපි දන්නවා. නමුත් ඒ දරාගැනීමේ සීමාවල් තිබෙනවා. ඒ නිසා ජනතාවට අත්‍යවශ්‍ය ආහාර ද්‍රව්‍ය ලබාදීමේ නිසි වැඩපිළිවෙළක් තිබිය යුතුයි.

ඒ වගේම තවත් පැත්කින් මේ රටේ විශාල ජනතාවක් එදාවේල හොයාගන්න දෛනික වැටුප් මත වැඩකරන බව අපි දන්නවා. ඔවුන්ට මේ වනවිට ආදායම් අහිමිවී තිබෙනවා. ඒ වගේම ඒ අයට අත්‍යවශ්‍ය ද්‍රව්‍ය ලබාගැනීමට නොමැති හිඟයකුත් තිබෙනවා. ඒ කියන්නේ ඒ අයට සල්ලිත් නැහැ, බඩුත් නැහැ. මේ තත්වය වැළැක්වීමට ආණ්ඩුව පියවර ගත යුතුයි. ආණ්ඩුව මේ වනවිට අරමුදලක් හදලා තියෙනවා. නමුත් ඒ අරමුදල තැන් තැන්වල ක්‍රියාත්මක වීම නවත්වා අත්‍යාවශ්‍ය අයට සහන ලැබෙන පරිදි යොදාගන්න කටයුතු කළ යුතුයි. මේ කටයුතු වෙනුවෙන් ග්‍රාම නිලධාරී මූලික කරගත්ත යාන්ත්‍රණයක් සකස්කිරීම ඉක්මනින්ම කළ යුතුයි. ඒ යාන්ත්‍රණයට සහයෝගය ලබාගැනීටම ස්වේච්ඡා සංවිධාන සහ පුද්ගලයන් එකතු කරගත හැකියි. ජනතා විමුක්ති පෙරමුණේ අපි ඒ වෙනුවෙන් මැදිහත්වීමට සූදානම් බව ආණ්ඩුවට දන්වා තිබෙනවා. ඇතිවී තිබෙන මේ තත්වය ගංවතුර, නාය යෑම, සුනාමිය වගේ තත්වයක් නෙවෙයි. මුළු රටටම බලපාන ආපදාවක්. මේ වගේ තත්වයක් තුළ සෞඛ්‍ය කාර්යමණ්ඩල වගේම ආරක්‍ෂක අංශ සහ අනෙකුත් අත්‍යවශ්‍ය සේවා සපයන අයට සහයෝගය ලබාදීමේ ස්වේච්ඡා කණ්ඩායම්වල දායකත්වය ලබාගැනීම අවශ්‍යයි. අපි පක්‍ෂයක් හැටියට මේ වනවිටත් ආරක්‍ෂක අංශවලට, සෞඛ්‍ය කාර්යමණ්ඩවලට මුඛ ආවරණ ඇතුළු වෙනත් ආරක්‍ෂක උපකරණ ලබාදී තිබෙනවා. ඒ වගේ රෝහල් පිරිසිදු කිරීම සහ රෝහල් තුළ වෙනත් අත්‍යාවශ්‍ය කටයුතු සම්පාදනය කරදී තිබෙනවා.

නමුත් පක්‍ෂයක් හැටියට අපිට තිබෙන මානව සම්පත සහ මන්ත්‍රී වැටුප් අරමුදලේ සීමාවන් තිබෙනවා. ඒ තුළ උපරිම කටයුතු කරමින් ඉන්න අතර සකස් කරන යාන්ත්‍රණයක කොටස්කරුවෝ හැටියට අපිට ස්වේච්ඡාවෙන් ජනතාවට සහන ලබාදීමේ මැදිහත්කරුවන් විය හැකියි. අත්‍යවශ්‍ය ආහාර ද්‍රව්‍ය සහ ඖෂධ ලැබිය යුතු අවසානම කෙනා දක්වා ඒවා සපයා දීමේ කටයුතු අපිට ස්වේච්ඡාවෙන් කළ හැකියි. මේ වෙනුවෙන් ඉක්මනින් යාන්ත්‍රණයක් ආණ්ඩුව සකස් නොකළහොත් කොරෝනා වෛරසයේ බලපෑමට වඩා වෙනත් විශාල ගැටළු ප්‍රමාණයක් මතුවීමේ අනතුර අපි දකිනවා. මේ වනවිටත් සමාජයේ බොහෝ තැන්වලින් ඒ ගැටලු සම්බන්ධයෙන් තොරතුරු අපිට ලැබී තිබෙනවා.

අමතර කාරණයක් හැටියට අපේ රටේ ආගමික හා සංස්කෘතික ගැටළුත් මේ තත්වය තුළ මතුවෙමින් තිබෙනවා. විශේෂයෙන්ම කොරෝනා වෛරසයෙන් මියගිය අය වගේම වෙනත් තත්වයන් යටතේ මියගිය අයගේ අවසන් කටයුතු කිරීමේදී ගැටළු ප්‍රමාණයක් මතුවී තිබෙනවා. අපි ජනතාවට අවධාරණය කරන්නේ වෛද්‍ය අංශ ලබාදෙන තොරතුරු අනුව රෝගයේ භයානකකම අවබෝධ කරගෙන එයින් වැළකීමේ ක්‍රියාමාර්ග මූලික කරගත යුතු බවයි. ආගමික හා සංස්කෘතික කටයුතු ඊට දෙවැනිව කල්පනා කළ යුතුයි. ලෝක සෞඛ්‍ය සංවිධානය පවා මේ වනවිට නිර්දේශ මාලාවක් ලබාදී තිබෙනවා. ඒ අනුව ක්‍රියා කිරීමේ අවබෝධය ජනතාවට ලබාදී ජන ජීවිතය පවත්වාගැනීමේ යාන්ත්‍රණය සකස් කිරීම ආණ්ඩුව ඉක්මනින් කළ යුතු බව නැවත අවධාරණය කරනවා. ඒ අඩුව නිසා සමාජයේ විවිධ තැන්වලින් මේ වගේ ගැටළු මතුවෙනවා. අපි අවධාරණය කරන්නේ ජාතික මට්ටමින් කල්පනා කර බලා ක්‍රියාකාරී සැලැස්මක් සකස්කර ස්වේච්ඡා සංවිධාන සහ අපි වගේ පක්‍ෂවල සහයෝගයත් ලබාගෙන මේ උවදුර ඉක්මනින් පරාජය කිරීමට ආණ්ඩුවේ තිබෙන වගකීම නිසි ලෙස ඉටුකළ යුතු බවයි.'' යන්නයි.

 - මහේෂ් හපුගොඩ - 

ඇත්තම ගැටළුව වී ඇත්තේ දැන් මිනිස් අධ්‍යාත්මය පිළිබද ප්‍රශ්නය හකීම් සහ සන්නස්ගල අතර තෝරා ගැනීමක් (වරණයක්) බවට පත්ව තිබීමයි. හකීම් මුස්ලිම් සමාජයේ වීරයෙක් සහ පොදු සමාජයේ ද්‍රෝහියෙක් බවට පත් කිරීමටත් සන්නස්ගල මුස්ලිම් ද්‍රෝහියෙක් සහ පොදු සමාජයේ වීරයෙක් බවට පත් කිරීමටත් මේ කොරෝනා පැනික් තත්වය බල කර තිබේ. ඒ කියන්නේ 'සෙනඟ' (ගිලි ඩෙලූස් ගේ වචනය) දැන් ඉන්නේ සන්නස්ගල පැත්තේ ය. ඒ සියළු අය කොරෝනා පැනික් තත්වය විසින් කෙසේ හෝ පණ බේරා ගන්නා තත්වයට ඇද දමා තිබීම නිසාය. මේ ධනේශ්වර ක්‍රමය මිනිසුන් ඇත්තට ජීවත් කරනු වෙනුවට ඒ මිනිසුන්ට ෆේස්බුක් නිදහසක් දී ඇත්ත පැවැත්ම තුළ මහපාරේ මැරෙන තත්වයට ඇද දමා ඇති නිසා ය. මේ නිදහස ඇත්ත නිදහසක් නොවේය. පවත්නා වෛද්‍ය පහසුකම් වල උපරිමයට ළඟා වූ පසු සියල්ලන්ට මැරෙන්න සිදු වන්නේ මහපාරේය. සුනාමිය, පාස්කුව වගේම මේ තත්වයත් සමස්ත ක්‍රමයේ නො-සුදානම පිළිබද දැවැන්ත ප්‍රශ්නයක් විනා අල්ලා හෝ යේසුස් හෝ බුදුන් 'වැළලීම' පිළිබද ම ප්‍රශ්නයක් නොවේය. මේ පාදඩ ක්‍රමය විසින් වළලා දමා ඇති මිනිස් අධ්‍යාත්මය (මිනිස් ආචාර ධර්මය) ගැන යම් පමණකින් හෝ කතා කරන්නේ ආගම පමණි. ඒවායේ දැවැන්ත අර්බුද නොමැති යයි මා නොකියන නමුත් කොරෝනා වට පෙර මේ ජඩ සුඛ පරමවාදය ට එරෙහි යම් හෝ දේශපාලනයක් කරමින් සිටියේ ද ඉස්ලාම් මූලධර්මවාදයයි. ඒ ඉස්ලාමීය දේශපාලනය, 'දේශපාලන නිරවද්‍යභාවට' (political correctness) හසු වුවේ නැති බවද මා දනිමි.

මේ කොරෝනා මරණ සියල්ල මැද ඩේවිඩ් බෙකම් සහ වික්ටෝරියා බෙකම් පවුම් මිලියන ගණනක නිවසක් මිළදි ගැනීම ගැන ඔබ සිතන්නේ කුමක් ද? චීනය මේ අස්සේ දැවැන්ත ලෙස ව්‍යාපාර හා කොටස් මිලදී ගැනීම ගැන කියන්නේ කුමක් ද? මේ සියල්ල මැද ට්‍රම්ප් ඇමෙරිකාව ව්‍යාපාර සඳහා නැවත විවෘත කිරීමට කඩි මුඩියේ උත්සාහ කිරීම ගැන ඔබ සිතන්නේ කුමක් ද? ආතතිය නිසා ජර්මන් මුදල් ඇමති වරයා සියදිවි නසා ගැනීම ගැන ඔබ සිතන්නේ කුමක් ද? ඒවා ස්වභාවික ද? ඉස්ලාමීය උමතුව ගැන වදවෙන ඔබ මේ ක්‍රමය 'උමතු' යැයි මොහොතකට වත් නොසිතන්නේ ඇයි? ඒ මේ ක්‍රමය ඔබට අවිඥාණික නිසාද ?

සියලු දේ උල්ලංඝනය කරන ලෙස අපට නියෝග කරන මෙම ක්‍රමය තුල එම විපරීත බව යම් තරමක් හෝ පාලනය කරන්නේ ආගම විසිනි. අපගේ තෙරක් පරක් නැති සුඛ පරම වාදයේ විනෝදය පාලනය කරන්නේ අන් කිසිවක් විසින් නොව මේ මොහොතේ ආගම විසිනි. මේ මොහොතේ එය ඉතාම රැඩිකල් දේශපාලනයක් කරයි. ඒ නිසා විසි වන සියවසේ පරමාදර්ශ බිඳ වැටෙන ලෝකයක අප ක්‍රිස්තියානි උරුමය වෙනුවෙන් සටන් කළ යුතු යැයි ජිජැක් කියා සිටී. ඒ අර්ථයෙන් හොඳ ආනාගමිකයෙක් විය හැක්කේ හොඳ ක්‍රිස්තියානුවෙකුට යැයි ද ඔහු වැඩිදුරත් කියා සිටී.

යුරෝපීය උරුමය ගැන ජිජැක් එසේ කියන විට පෙරදිග මිනිසෙක් ලෙස මා සිතන්නේ හොඳ ආනාගමිකයෙක් වීම සඳහා මුලින් හොඳ බෞද්ධයෙක් විය යුතුය කියා ය. එසේම සත්‍යය තිබෙනු ඇත්තේ හකීම් - සන්නස්ගල වරණයට (forced choice) ඔබ්බෙන් තැනක බවත් විශ්වාස කරමි.

එසේම අධිනිශ්චය වී ඇති ඉහත දයලෙක්තියක අභිබවා යා හැකි දෘෂ්ටිමය බලයක් මේ සටහනට නැති බවත් මා විශ්වාස කරමි. ආමෙන්!

මූලාශ්‍ර 

Zizek, S. (2000). The Fragile Absolute: Or, Why Is The Christian Legacy Worth Fighting For? London. Verso.

Zizek, S. (2016). Is God Dead, Unconscious, Evil, Impotent, Stupid...Or Just Counterfactual? International Journal of Zizek Studies. Vol.10, No. 01. (Online).

- රවීන්ද්‍ර මල්ලවාරච්චි - 

පසුගිය මාර්තු 29 වන දා කෝට්ටේ නගරාධිති මධුර විතානගේ ඔහුගේ පුද්ගලික ෆේස් බුක් පිටුවේ නාවික හමුදාව අප්‍රසන්න ලෙස හෙලා දකිමින් පෝස්ටුවක් පලකර තිබුණි. ඒ "නාවික හමුදාව කෝට්ටේ නගරසභාව හදපු නිරෝදායන කුටිය ඇවිල්ලා කොපි කරලා තමන් හොයාගත්තා වගේ ලොරි ටෝක් මාධ්‍යවල" යන්නයි.  එහි සැබෑ කතාව සැකෙවින් මෙසේය. 

රට තුල පැතිරෙන කොවිඩ් 19 මාරාන්තික වයිරසය මැඩ පැවැත්වීමට රජය, සෞඛ්‍ය අංශ මෙන්ම ආරක්ෂක හමුදා සහ බොහෝ රටට හිතැති මනුෂ්‍යවාදී සිවිල් වැසියන් (අර කැලේ පැනපු බූරු හැත්තයි ඇඳිරිනීතිය අස්සේ  පොර ටෝක් දිදී පාරවල් ගානේ ලගින බූරු හැත්තයි ඇරෙන්න) එකා මෙන් පෙල ගැසෙන සැටි අප දුටුවෙමු. හෙද වෙද මඩුල්ල දිවා රෑ නොබලා තමාගේ ජීවිත පවා උකස් කරමින් ජීවිත ගලවා ගැනීමේ සටනට උර දෙද්දී ආරක්ෂක අංශද හරි හරියට ඒ සියලු දේ සඳහා ඔවුන්ගේ ශක්තිය ලබා දුන්නා. මේ අතරතුර නාවික හමුදාව නිර්මාණය කරපු නිරෝධායන කුටිය ගැන බොහෝ දෙනා ප්‍රශංසාත්මකව කතා කලේ මේ මොහොතේ ඔවුන් කරන කැප කිරීම සැබැවින්ම අගය කල යුතු නිසාය. නාවික හමුදාවේ නැගෙනහිර ප්‍රදේශයේ නව නිපැයුම් අංශය විසින් දේශීය අමුද්‍රව්‍ය යොදාගෙන මේ නිරෝධායන කුටි නිර්මාණය කරන්නේ නාවික කඳවුරු වල භාවිතයට මෙන්ම රෝහල් සඳහාද ලබා දීමටය. සැබැවින්ම තාක්ෂණයෙන් අනූන නැව් සමඟ හැප්පෙන මොවුන්ට මෙවැනි නිර්මාණ ඉතා සුලු දෙයකි. 

කෙසේ නමුත් මේ අතරවාරයේ කෝඩ්ජෙන් වැනි  දේශීය ආයතන ද මේ නිරෝධායන කුටි නිර්මාණයට උනන්දුවූයේ ලාභයක් බලාපොරොත්තුවෙන් නොවේ. මේ හා සමගාමීව කෝට්ටේ නගර සභාව විසින්ද නිරෝධායන කුටියක් නිර්මාණය කර තිබුනි. එවැනි ක්‍රියා සැබැවින්ම අගය කල යුතුය. එය මේ මොහොතේ රටට අවශ්‍යම දෙයකි. නාවික හමුදාවද නගරසභාවේ නිර්මාණය පිලිබඳ සොයා බලන්නේ එහි යම්කිසි හොඳ අංගයන් ඇත්නම් ඒවා එකතුකර වඩාත් හොඳ නිර්මාණයක් රටට ලබා දීමටය. කෙසේ නමුත් නගරසභාව නිර්මාණය කල නිරෝධායන කුටිය ඔවුන් අතහැර දමන්නේ එහි තිබූ අනාරක්ෂිත සැලසුම මතය. කුටිය තුලට යන විදුලි රැහැන් වල පුංචිම හෝ කාන්දුවක් තිබුනෝත්  ඒ තුලට විදින අධි සාන්ද්‍ර ඇල්කොහොල් ස්ප්‍රීතු ඕනෑම විටෙක ගිනිගෙන ඇතුලේ සිටින කෙනාට අනතුරක් විය හැකිව තිබුනි. ඒ නිසා වඩා හොඳ ආරක්ෂිත ක්‍රියාමාර්ග පිලිබඳ අධ්‍යනය කොට නාවික හමුදාව සිය නිර්මාණය නිම කරන ලද අතර රෝහල් හා පෞද්ගලික ආයතන ගනනාවකින් ද ඒ සඳහා හොඳ ඉල්ලුමක් ලැබනේ නිර්මාණයේ සාර්ථකබව කියා පාමිනි. ඒ සියලු දෙනා වෙත කුටි ලබාදීමටත් සමහර ආයතන වෙත තාක්ෂණයද ලබා දීමට නාවික හමුදාව කටයුතු කරන්නේ රුපියලකවත් ලාභයක් බලාපොරොත්තුව නොවන බව පැහැදිලිය. නගරාධිපතිගේ බලලා මල්ලෙන් එලියට අත දාන්නේ මේ අවස්ථාවේදීය. 

අපට ආරංචි වූ හැටියට ඔහු විසින් ලෝකෙට අණ බෙර ගසා නිර්මාණය කල අනාරක්‍ෂිත ගිනි උඳුනක් බඳු වූ නිරෝධායන කුටිය කොවිඩ් බියෙන් සලිත වූ ආයතන වෙත ව්‍යාපාරික මට්ටමෙන් ලබා දී කොමිස් මුදල් හෝ යම් ලාභයක් ලැබීමේ සැලැස්මක් තිබී ඇත. නාවික හමුදාව නොමිලයේ නිරෝධායන කුටි රටේ ජනතාව වෙනුවෙන් ලබාදීමත් ඒ සඳහා ඉහල ඉල්ලුමක් ලැබීමත් තුල නගරාධිපතිවරයා විරුවට පත්වී ජනතා සේවය නම් වූ බැටලූහමට යටින් සිටි සැබෑ බඩගෝස්තරවාදී මෙන්ම අවස්ථාවාදී වෘකයා මතුවී ප්‍රසිද්ධියේම නාවික හමුදාව සමාජමාධ්‍ය තුල පතුරු ගැසීය. 

මීට දින කිහිපයකට පෙර හිටපු බස්නාහිර පලාත් පලාත් ආණ්ඩුකාරතුමිය වෛද්‍ය සීතා අරඹේපොල මහත්මිය අපූරු කතාවක් පැවසුවාය. මේ මොහොතේ කොවිඩ් වයිරසයෙන් රටවැසියා බේරා ගැනීමට දිවිහිමියෙන් කටයුතු කරන හෙද වෙද මඩුල්ල මෙන්ම ආරක්ෂක අංශ සිදුකරන අපරිමිත සේවයේ කොතෙක් අඩුපාඩු කිසිවෙකුට පෙනුනත් පෑන් ඉරකින් හෝ වචනයකිත් හෝ සිතුවිල්ලකින්වත් සෘණාත්මක විවේචන නොකර ඔවුනට ශක්තියක් වන ලෙස එතුමිය හැඟීම්බර ආයාචනයක් කලේ රට වැසියාගේ අනුකම්පාව දිනාගැනීමට නොව හදවතේ ඇතිවූ සැබෑ ආවේගයට බව එය අසා සිටි ඕනම අයෙකුට පසක් කරමිනි. එසේම මේ මොහොතේ ඔවුන්ගේ චිත්ත දෙර්‍ය්ය දශමයකින් හෝ බිඳ දමන අයෙක් වේ නම් ඔහු දේශද්‍රෝහියෙකි. 

නගරාධිපතිතුමනි. නාවික හමුදාව ඔබේ නිරෝධායන කුටික කොපි නොකල බව පැහැදිලිය. නමුත් සැබැවින්ම නාවික හමුදාව එක කොපි කර තිබුනත් ඔවුන් එය සිදුකලේ ලකුණු දමාගෙන පාර්ලිමේන්තු ඒමට නොව රටේ ජනතාවගේ ජීවිත ගලවා ගැනීමට බව සිතා ඔබට සතුටු වන්නට තිබුනේය. ඔබ වැනි ජනතා නියෝජිතයෙක් ඉන් රටවැසියන් දහස් ගනනාවකට ජීවිතදානය ලැබෙන සැටි සිතා සැබෑ මනුෂ්‍යත්වයෙන් සතුටු වන්නට තිබුනි. නමුත් අවාසනාවකට මෙන් එය එසේ නෙවීය. අහිංසක මිනිසුන්ගේ මලමිනී මතින් හෝ ඡන්දය සොයන ඔවුන්ගේ ජීවත්වීමේ අයිතිය පවා උකසට තබමින් මඩියේ පුරවාගැනීමට මුදල් සොයන අවස්ථාවාදී බලලා ඔබේ මල්ලෙන් එලියට පැන්නේ රටටඔබේ සැබෑ ප්‍රතිරූපය පෙන්නමිනි. 

අපපසු බව බලද්දී නගරාධිපති මධුර විසින් නාවික හමුදාව පතුරු ගසූ පෝස්ටුව ඉවත්කර තිබුනේ වැඩේ වැරදුන බව දැනුන නිසාවෙන් විය හැක. රට රකින හමුදා රණවිරුවන්ගේ බූට් එකට පෑගෙන අසූචි පිඩක් තරම්වත් ඔබ වැනි කුහකයින් අපට වටින්නේ නැත. අතිගරු ජනාධිපති තුමනි. ඔබ තුමා සැබෑ විරුවෙක් වනවා සේම පාට පක්ෂ භේදයකින් තොරව රටවැසියා ඔබ තුමාට ආශිර්වාද කරන්නේ ඔබතුමා තුල ඇති අප්‍රතිහත නායකත්වයත් සැබෑ දර්ශණයත් නිසාය. නමුත් ඔබ තුමාගේ සෙවනැල්ලට යට තපින මෙවැනි ආත්මාර්ථකාමී අවස්ථාවාදීන් ජනතාසේවයට මුවා වී කුලහීන පාලකයන් සේ යළිත් මේ  රට අගාධයට ගෙන යා හැකි බව සිතෙහි තබා ගන්න. නාවික හමුදා විරුවන්ට අපගේ ප්‍රණාමය.

සාකච්ඡාව  - ඉඳුනිල් උස්ගොඩ ආරච්චි

කොවිඩ්-19 නැත්නම් කොරෝනා ගෝලීය වසංගතයක් බවට පත්ව තිබෙනවා. මෙවැනි අවස්ථාවක අපේ රටේ පූජ්‍ය පක්ෂයේ කාර්යය හා වගකීම විය යුත්තේ මොකක් ද?

අපි මේ මුහුණ දී තිබෙන ප්‍රශ්නයේ අංශ ගණනාවක් තිබෙනවා. එකක් භෞතික වශයෙන් මේ වෛරසයට අප විවෘත වූ විට සිදුවන ක්‍රියාවලියයි. එයින් ආරක්ෂාවීමට අවශ්‍ය දැනුම බෙදීමේ ක්‍රියාවලිය යි. එය අදාළ අංශ වලින් ඉතාම හොඳින් කරගෙන යනවා. අපිට කරන්න පුළුවන් දේ එයට සහාය ලබාදීම යි. අපි මේ වෙලාවේ ඒ සෞඛ්‍ය ක්ෂේත්‍රය ලබා දෙන පණිවුඩයට සියලුදෙනා අනුගත වෙන්න ඕනෑ. බුදුහාමුදුරුවෝත් වෛද්‍යවරුන්ගෙන් ප්‍රතිකාර ලබා ගත්තා. 

ඇත්තටම මේ වෙලාවේ පූජ්‍ය පක්ෂය වුණත් සමූහගත වීම උත්තරය නෙමෙයි. කළ යුතු වන්නේ වෛද්‍ය උපදෙස් අනුව කටයුතු කිරීම යි. මිනිස්සු ආගමික නායකන්ට සවන්දෙන තත්ත්වය මේ වෙලාවේ මේ වෛරසයට මුහුණදීමට අවශ්‍ය සෞඛ්‍යමය හා විද්‍යාත්මක පාර්ශ්වයෙන් ලැබෙන දැනුම සමාජගත කිරීමට පාවිච්චි කිරීම උචිත බවට මම යෝජනා කරනවා. එය පූජ්‍ය පක්ෂයෙන් කළ හැකි එක් සහයෝගයක්.

දෙවැන්න, නොයෙක් පුද පූජා වැනි දේට මිනිසුන් එක් රැස් නොකර සිටීම යි. එසේ නොකර ආගම පැත්තෙන් කළ හැකි දේ තිබෙනවා. දින ගණනාවක් පවුලේ අය ගෙවල් වලින් පිටතට යන්නේ නැතිව ඉන්නා විට විවිධ පීඩන මතුවෙන්න පුළුවන්. ඒවා වැළැක්වීමට එක් රැස්වීම් වලින් තොර යම් ආධ්‍යාත්මික වැඩපිළිවෙළක් දියත් කරන්න පුළුවන්.

ඒ වගේම ආහාරවලින් සූදානම්වීමත් කළ හැකියි. අපි වීඩියෝ නොකළත් ගස්වල කොස් කඩලා අටුකොස් සෑදීම ආදී ලෙස ආහාර වලින් සූදානම් වීමේ කටයුතුත් සිදුකිරීමට කල්පනා කළා. එවැනි දේ වුවත් අපි මිනිස්සු අතරට ගෙන යා යුතුයි කියලා මම හිතනවා. ඒවා අපේ පරණ දැනුම. අපි ආහාර වර්ග කල් තබා ගැනීමේ ක්‍රම දැන සිටියා. කාලයත් සමග පැකට් කරන ලද සියලු දේ ගන්න අපේ ඔළුව හැදූ තත්ත්වයක් තුළ දැන් අපට එම දැනුම නැහැ. හැබැයි ඒ දැනුම තියන වැඩිහිටියෝ තවම ඉන්නවා. ඒ නිසා එවැනි අංශ ගණනාවකින් අපිට වැඩ කරන්න පුළුවන් කියලා මම හිතනවා.

දේශපාලන හෝ ජාතිවාදී අරමුණු වලින් විශාල හඬක් නගන ඇතැම් චීවරධාරීන් සිටියත් සැබෑ ලෙසම ජනතාව අර්බුදයකට මුහුණදෙන මේ අවස්ථාවේ ඔවුන් නිහඬතාව ආරක්ෂා කරන බව පෙනෙනවා.

දේශපාලනයට යොමුවූ සහ දේශපාලනඥයන් පාවිච්චි කරන හාමුදුරු පිරිසක් ඉන්නවා. මාධ්‍ය ආකර්ෂණය කරගෙන ඒ අයගේ පණිවිඩය දෙන්න ඒ අය දන්නවා. මේ වෙලාවේ ඒ අයට ඒ වැඬේ කරන්න අමාරු වෙන්න පුළුවන්. ඒ අය ගැන විශේෂයක් නොදක්වා අපි කටයුතු කරන එක තමයි මේ වෙලාවේ කළ යුතු වෙන්නේ කියලා මම හිතනවා.

මෙම අර්බුදය හමුවේ ආණ්ඩුව කටයුතු කරන ආකාරයේ සාර්ථක අසාර්ථකභාවය පිළිබඳ විවිධ මත පළවෙනවා. මෙවැනි වසංගත තත්ත්වයක් පැතිරෙන අවස්ථාවක කටයුතු සිදුවන කරන ආකාරය පිළිබඳ සෑහීමකට පත්විය හැකි ද, එසේ නොවේ නම් ඒවා විධිමත් කිරීම වෙනුවෙන් ප්‍රතිචාර දැක්විය යුතු වන්නේ කොහොම ද?

මේ වන විට රජය ස්ථාවර වුණු එකක් නෙමෙයි. ජනාධිපතිවරයා අලුත් කෙනෙක්. ඒක සකස්වෙමින් පවතින තත්ත්වයක තමයි මේ ගැටලුව මතුවන්නේ. ඒ අයත් ඉගෙන ගනිමින් මේ කටයුතු කරනව බව පෙනෙනවා. මුලින්ම ඇඳිරිනීති දාලා මේක නතර කරන අදහසක් තිබුණේ නැහැ කියලා මම හිතනවා. හැබැයි ඒකට ආ අනෙක් මත ඉදිරියේ ඒ අය නම්‍යශීලීව ඒ කටයුතු කිරීමට ඉඩ සලසා තිබුණා. ඒ වගේම ඊළඟට එන්න පුළුවන් ප්‍රශ්නය තමයි මිනිස්සුන්ට ආහාර ලබා ගැනීම. ඉදිරියේ දී ඒ යාන්ත්‍රණයන් විධිමත් ලෙස සකස් කරාවි කියලා මම හිතනවා. මේ වෙලාවේ මම විවේචනාත්මක වෙන්නේ නැහැ. මොකද අඩුපාඩු තිබුණත් මේක ඒවා හදාගෙන යන්න ඕනෑ තත්ත්වයක්. මේක මම දකින්නේ අපි ඔක්කෝම වගකීම බෙදාගන්න ඕනෑ තත්ත්වයක් විධියටයි. මේක පැතිරීම වැළැක්වීම ඇත්තටම රජයට විතරක් තනියම කරන්න බැහැ. අපි දින පහළොවක් විස්සක් පරෙස්සමින් කටයුතු කළොත් මම හිතන්නේ මේක වළක්වන්න වේවි. රජය කරන්න ඕනෑ මිනිස්සු එළියට යාමට බල කරන ආහාර, බෙහෙත් වැනි මූලික අවශ්‍යතා වෙනුවෙන් විධිමත් යාන්ත්‍රණයක් ගොඩනැගීම තුළින් ඒවාට පිළිතුරු සොයා දීමයි.

නිරෝධායනය වැනි කටයුතුවල දී පැන නැඟුණු ගැටලු සමග ඇතැම් පුද්ගලයන් මෙන්ම කුඩා දරුවන් පවා අපහසුතාවට පත්වන ආකාරයේ ද්වේශ සහගත ප්‍රතිචාර එල්ලවීම්, සදාචාරාත්මක නොවන ප්‍රචාරයන් සිදුවනු සමාජය තුළ දක්නට ලැබෙනවා. මේ තත්ත්වය ඔබ දකින්නේ කොහොම ද?

මේ පවතින තත්ත්වය අපට පළපුරුදු තත්ත්වයක් නෙමෙයි. ලංකාව විවිධ ගැටලු වලට මුහුණ දීලා තිබුණත් මෙම තත්ත්වය ඒවාට වඩා වෙනස් එකක්. එනිසා මෙවැනි අවස්ථාවක ගැටලු මතුවීම සාමාන්‍ය දෙයක්. ඒ කියන්නේ මේක කළමනාකරණය කරගන්න යද්දී කාටවත් අත්දැකීම් නැහැ. ඒකෙදී හැම පාර්ශ්වයක්ම නම්‍යශීලී වෙන්න ඕනෑ කියලා මම හිතනවා. ඒ වගේම මීට කලින් මොනවාහරි බෙදීම් තිබුණා නම් තවදුරටත් ඒ බෙදීම් මොන විධියට හෝ නඩත්තු වන දේ නොකළ යුතුයි. ඒ නිසා නිරෝධායනයට නොගිය අය සම්බන්ධයෙන්වත් මම හිතන්නේ අපි අහිතක් නොසිතා ඒ අයගේ හිත වෙනස් කර මේකට යොමුකරන්නේ කොහොම ද කියන දේ ගැන කටයුතු කළ යුතුයි. මොකද, මොකද්ද මේ වෙන්නේ කියලා ඒ මිනිස්සුත් හරියට දන්නේ නැහැ. ඒ නිසා ඒ ප්‍රවේශය ඉතාම වැදගත් කියලා මම හිතනවා.

වෛරසයට ජාති ආගම් භේද හෝ සමාජ තරාතිරම වැදගත් වෙලා නැති වුණත් වගකීමෙන් කටයුතු කළ යුතු පාර්ශ්වයන් පවා ඇතැම් අවස්ථාවල මේ තුළ බෙදීම් අමතක කර නැති බව පෙනෙනවා.

ඔව්. එක් පුවත්පතක් රෝගීන් පිළිබඳ හඳුන්වා දී තිබුණේ පළමු රෝගියා මත්තේගොඩ ප්‍රදේශයේ සංචාරක මගපෙන්වන්නෙක්, දෙවැන්නා ශ්‍රී ලාංකිකයෙක්, තුන්වැන්නා එංගලන්තයේ සිට පැමිණි මඩකළපුව ප්‍රදේශයේ අයෙක් බවත් ඔහුගේ ජාතිය කුමක් ද යන්නත් වාර්තා කිරීමෙනුයි. තවත් කොරෝනා වැළඳුණු රෝගියෙකු එය පිළිගන්නේ නැතිව වෛද්‍යවරු සමග රණ්ඩු වූ පුවතක් සම්බන්ධයෙනුත් පුවත්පතක් වාර්තා කර තිබුණේ ඔහුගේ ජාතිය කුමක්ද යන්නත් ඉස්මතු කරමිනුයි. මෙතරම් දෙයක් වුණාට පසුවවත් මේ මාධ්‍ය ආයතනවල අය අවදි වෙලා නැහැ. ඇත්තටම කොරෝනා ඉතාම හොද පණිවිඩයක් ගෙනෙනවා. නමුත් අපි තවම ඒකට අවදිවෙලා නැහැ.

ගෝලීය වසංගතයක් වන කොරෝනා සමාජ ආකල්පමය වෙනසක් ගෙනෙන පණිවුඩයක් බවට පත්කරගත හැකි වන්නේ කොහොමද ?

මේ තිබෙන අභියෝගය මුළු මානව වර්ගයාට එරෙහි අභියෝගයක්. ඒ නිසා ඒ ඉදිරිපිට ඉතාම ධනවත් පුද්ගලයා ද රජ කුමාරයා ද කියා එකක් නැහැ. ඒ අතින් මේක වෙස් වළාගෙන එන ආශිර්වාදයක් කියලා මම දකිනවා. අපි මවාගෙන සිටි ලෝක සම්පූර්ණයෙන්ම බිමටම කඩලා දාලා අපි මනුෂ්‍යයෝ හැටියට එකිනෙකා ගැන බලන්න ඕනෑ කියන පණිවිඩය එහි තියනවා. ඒ විතරක් නෙමෙයි, ලෝකයේ රටවල්වල රෝගීන්ට ලබාදෙන්න තරම් ඇඳන් නැති වුණත් මම හිතන්නේ ජනගහනයෙන් භාගයක් නසන්න තරම් ඒ හැම රටකම වගේ ආයුධ තියනවා. එතකොට අපි ආව පාර, ඒ ආ ගමන කොරෝනා විසින් බරපතළ විදියට අභියෝගයට ලක් කරලා තියනවා කියලා මම හිතනවා. ඒ නිසා මෙතැනින් එහාට මානව ශිෂ්ටාචාරය වෙනස් විය යුතුයි. ඒ සඳහා අපි වැඩ කරන්න ඕනෑ. මේක අවසන් වුණාට පස්සේ නැවත වෙළෙඳපොළ ආර්ථිකය හැකි තරම් ලාභ ලැබීම්, පරිසරය අසීමිත විදියට හූරාකමින් ඒ ගැන කිසිම හැඟීමක් නැතිව කරන විනාශය අවම වන ආකාරයෙන් කටයුතු කරන්නේ කොහොමද කියන දේ හිතන්න අවශ්‍යයි. මේ වෙලාවේ කුරුල්ලන්ට, අනෙක් සතුන්ට කොහොම දැනෙනවා ඇති ද කියලා අපි නිකමට හිතමු. මුළු ලෝකයේ ම මිනිස්සු වැඩ කළේ වෙන කිසිම ජීවියෙක් ඉන්නවා ද, ඒ අයත් එක්ක ඉන්න ඕනෑ කොහොම ද කියන හැඟීමක් නැතිව යි. අනෙක් අයත් ඉන්න ඕනෑ, ඒ අයට වදයක් නොවෙන විධියට අපි ඉන්නේ කොහොමද කියන දේ සහ පරිසරය විනාශ කරගෙන අපිට යන්න බැහැ කියන දේ අපි තේරුම් ගත යුතුයි. එවැනි දැවැන්ත වෙනස්කම්වලට මේක දොරටුවක් වේවි.

මේක පොදුවේ මුළු මානව සංහතිය සම්බන්ධයෙන් වන ප්‍රශ්නයක්. අපි ඒ විදියට මේක තේරුම් ගත යුතුයි. අපේ වගකීම් මොනවා ද කියලා ඒ අනුව තේරුම් ගත යුතුයි. මේකට නිකම්ම ඇවිත් යන්න නොදී මෙය ගෙන එන පණිවුඩය අපි වටහා ගන්න ඕනෑ. අපි එකිනෙකාට ආදරය කරුණාව දැක්විය යුතුයි. ඇයි අපිට අවි ආයුධ ඕනෑ වෙන්නේ, කොතැන හෝ මිනිස්සු මැරීමට නේද. තණ්හාව සහිත ගමනේ ප්‍රතිඵලය නිසා තමයි ආයුධ ඕනෑ කරන්නේ. බුදුදහම, කිතු දහම වැනි ඒවායේ ආගම් හරයන් ගත්තාම දුකට හේතුව තණ්හාව බව කියවෙනවා. අනෙක් ආගම් පිළිබඳ මම ගැඹුරට දන්නේ නැහැ. ඒ වගේම අල්පේච්ඡ බව පිළිබඳවත් එම ආගම් දෙකේම කියැවෙනවා. බෙදාහදා ගැනීම් ගැන සඳහන් වෙනවා. එහෙම නම් අපේ ජීවිත වලට ආයුධ ඕනෑ කරන්නේ නැහැ, මේ තරම් තරග නැහැ. අපේ රටේ ඉන්ධන භාවිත කරන වාහන වෙනුවට විදුලි වාහන පාවිච්චි කරන්න අපට බැරි ඇයි. අපේ සම්පත් හඳුනාගෙන පරිසරයත් රැකගෙන යන්නේ කොහොමද කියලා අපිට හිතන්න බැරි ඇයි. මෙහි ආකල්පමය වෙනසකට පාදක වෙන ගොඩාක් පැති තියෙන්න පුළුවන්. ඒ නිසා මේක නිකම්ම රෝගයක් වෛරසයකට වඩා මේක ඊට එහා ගිය එකක් කියලා මම හිතනවා.

මෙම දිනවල ගෘහස්ත ප්‍රචණ්ඩත්වයේ වර්ධනයක් ද වාර්තා වන බව සෞඛ්‍ය අංශ වාර්තා කර තිබුණා. නිවාස තුළ හිරවීම සමග ඇතිවන ආතතිය දුරලීම සම්බන්ධයෙන් ආගමික නායකයින්ට ගතහැකි ක්‍රියාමාර්ග මොනවාද ?

පිටතට යන්නේ නැතිව දින ගණනාවක් නිවෙස්වල රැඳී ඉන්නා විට විවිධ පීඩන මතුවෙන්න පුළුවන්. විශේෂයෙන් ළමයින්ට සෙල්ලම් කරන්න එළියට යා නොහැකියි. ඒ වගේම පවුලේ අය අතරත් ගැටුම් ඇති වෙන්න පුළුවන්. ඉස්සර නම් ගැටලුවක් මතුවන විට එක් අයෙක් එළියට ගිහින් ටිකක් ඉඳලා එද්දී ඒ ගැටලුව ඉවර වෙලා වෙන්න පුළුවන්. දැන් එසේ කළ නොහැකි වීමත් ගෘහස්ථ ප්‍රචණ්ඩත්වය මතුවෙන්න එක් හේතුවක් වෙන්න පුළුවන්. ඒ නිසා යම් කිසි ආධ්‍යාත්මික වැඩපිළිවෙළක් දියත් කරන්න පුළුවන්. ඒ ඒ ආගම අනුව ඒවාට විවිධ ක්‍රමවේද තියනවා. බෞද්ධ ධර්මය පැත්තෙන් මෛත්‍රී භාවනාව හෝ සතිය පිහිටුවා ගැනීම වෙන්න පුළුවන්. මේ වෙලාවේ ඉතාම වැදගත් වෙන්නේ සතිය පිහිටුවා ගැනීමයි. තමන් ඇල්ලුවේ මොනවාද, තමන් තව කෙනෙක්ට කොතරම් දුරින් ද ඉන්නේ, තමන් දාගෙන ගිය පාවහන් එළියේ ගලවා ආවාද නැතිනම් එයත් සමගම නිවස තුළට ආවා ද ආදී ලෙස සතිය පිහිටුවා ගැනීම කියන දේ සම්පූර්ණයෙන්ම මේකට අදාළයි. ඒ නිසා අන්තර්ජාලය හරහා භාවනා වැඩසටහනක් පටන් ගැනීමටත් අප සැලසුම් කර තිබෙනවා. එවැනි දේ ආගම් පැත්තෙන් කරන්න පුළුවන්. ඒ වගේම ලෝකය පුරා තිබෙන බෞද්ධ ආගමික ස්ථාන පහළොවක් පමණ එකතුවෙලා එක් ආයතනයක් පැය බැගින් මාරුවෙන් මාරුවට විසිහතර පැය පුරා වන පිරිත් වැඩසටහනක් අන්තර් ජාලය හරහා සිදුකිරීමටත් කටයුතු සූදානම් කර තිබෙනවා. මේ වෙලාවේ අපටත් සීමාවල් තියනවා, එළියට බහින්න බැහැ. ඒ නිසා ආධ්‍යාත්මික කටයුතු සඳහා එවැනි ක්‍රම අනුගමනය කළ හැකියි.



(උපුටා ගැනීම - ‘රාවය‘ පුවත්පතිනි)