Hot!

‘'මෝඩයින්ට බය වෙන්න ඕන ඇයි ?‘‘


මෙරට ප්‍රමුඛ පෙළේ රූපවාහිනී නාලිකාවක් සිය ප්‍රධාන ප්‍රවෘත්ති විකාශය (නොවැම්බර් 12 වැනිදා) අතරතුරදී ඉදිරිපත් කළ කැළණි ගං පතුලෙන් නාග ලෝකයට ගොස් බුදුරදුන්ගේ ධාතු ගෙන ආ කතාව සමාජ මාධ්‍ය තුළ  දැඩි කතාබහට ලක්වෙමින් තිබෙනවා. 

නාග ලෝකයෙන් ධාතු වැඩම වූ කතාව තහවුරු කරන්නට කැළණිය රජමහා විභාරයේ විභාරාධිපති, මහාචාර්ය කොල්ලුපිටියේ මහින්ද සංරක්ඛිත හිමි ද ඉදිරිපත්ව සිටි බව අදාළ පුවත් විකාශයේදී දැකගන්නට හැකිවුණා.  මෙවර ජනාධිපතිවරණයට ඉදිරිපත් වන අපේක්ෂකයෙකුගේ ප්‍රතිරූපය ඉහළ නැංවීමේ අරමුණින් මේ නාටකය දියත් වුණු බව බොහෝ දෙනාගේ අදහසයි.  


අනෙක් කාරණය වී තිබෙන්නේ අදාළ අපේක්ෂකයා ජනාධිපතිවරණයට ඉදිරිපත් වන පක්ෂයේ සංකේතය ද සංඝරත්නය විසින්ම කැළණි පන්සලට පැමිණෙන සැදැහැති ජනයා අතර ප්‍රවර්ධනය කිරීමයි. 

මේ ගැන සිය මුහුණු පොතේ අදහසක් පළකල ප්‍රවීණ සිනමාවේදී අශෝක හඳගමගේ සටහනක් මෙහි උපුටා දක්වන්නේ වත්මන් ලාංකේය සමාජයට අත්වී තිබෙන ඛේදවාචකය මෙන්ම ජන මනස එතැතින් ඔබ්බට ජනාධිපතිවරණයේදී කෙලෙස හැසිරෙනු ඇත්දැයි යන්න ගැන ඔහු සිදුකර ඇති අනතුරු ඇඟවීම ගැන පෙන්වා දීමටයි. 

“හාමුදුරුවනේ ආදී ලංකාවේ හිටියේ යක්ෂයින් ද” කියලා අහනකොට ගමේ පන්සලේ හාමුදුරුවෝ අපට කියලා දුන්නේ “නැහැ දරුවෝ යක්ෂ ගෝත්‍රයේ මිනිස්සු‘‘  කියලා. ඒ හැටේ දශකයේ විතර හාමුදුරුවරු. ඒ වුණාට දැන් ඩිජිටල් යුගයේ බණ අහන වැඩිහිටි දරුවන්ට හාමුදුරුවෝ කැළණි ගං පතුලේ නාග ලෝකෙන් නාග ධාතු ගෙනත් පෙන්නනවා.

නාග ලෝකෙට කිමිදිලා නයාගේ කටින් නාග ධාතු අරං එන්නේ ටික කාලෙකට කලින් තමන් බුදු වුණේ යැයි කියමින් හතර වරං කෙලපු හොරෙක්. හරි නම් පන්සල් හතර මායිමකට වද්දා ගත යුතු නැති පොරක්. ඒත් මේ සා බොරුවක් කරපු මුචලින්දයින් ට පන්සලේ දොරවල් තාම ඇරිලා.

චන්ද‍ෙට ඉස්සර වැල නොකැඩී අපේ අය නාග ධාතු වඳින්න යනවා. ඒ අය ඕන ධාතුවක් වැඳ ගත්තට අපට කමක් නැහැ. එත් ඇඟ හිරි වැටෙන්නේ ධාතු වැන්ද සර්ධාවෙන්ම මේ අය 16 වෙනිදා චන්දෙ පෝලිමේත් යනවා නේද කියලා මතක් වෙනකොටයි.

ආජන්ටිනාවේ ගායකයෙක් කියපු මේ කතාව සසංක පෙරේරා තමන්ගේ මුහුණු පොතේ බෙදාගෙන තිබුණා.

“මගේ සීයා හරි නිර්භීත මිනිහෙක්. එයා බය මෝඩයින් ට විතරයි. මම දවසක් සීයගෙන් ඇහුවා ඇයි සීයේ මෝඩයින්‍ට බය කියලා. එයා කිව්වා, බහුතරයක් ඉන්නේ ඒ අය. උන්ට පුළුවන් උන්ගේ වැඩි ඡන්දෙන් ජනාධිපති කෙනෙක් වුණත් පත්කරගන්න කියලා.”

සුබ අනාගතයක් !‘‘

0 comments: